Bir neçə yolda nəqliyyatın hərəkəti qismən məhdudlaşdırılır

"Azəravtoyol" ASC tərəfindən Bakı şəhərində avtonəqliyyat vasitələrinin hərəkətinin tənzimlənməsi məqsədi ilə, piyada keçidlərinin, yol-cizgi və yolgöstərici xətlərin yenidən rənglənməsi işləri davam etdirilir.

ASC-nin Mətbuat Katibliyindən METBUAT.info-ya verilən məlumata görə, analoji işlər bu gün axşam saatlarınadək Nizami rayonu, Heydər Əliyev prospektindən Mikayıl Əliyev küçəsinə düşən avtomobil körpüsünün üzərində aparılacaq.

Axşam saat 22:00-dan başlayaraq səhər saatlarınadək isə rənglənmə işləri Nərimanov və Xətai rayonları, "Ramstore" yol qovşağında (10-cu zavod dairəsi) aparılacaq.

Rənglənmə işlərinin aparıldığı ərazilərdə avtonəqliyyat vasitələrinin hərəkəti hissə-hissə qismən məhdudlaşdırılacaq. Məhdudlaşdırma işlərin aparıldığı zolaqlar üzrə tətbiq ediləcək. Digər zolaqlar üzrə isə hərəkət açıq olaraq qalacaq.

"Azəravtoyol" ASC sürücülərdən sözügedən ərazilərdə diqqətli olmalarını tövsiyə edir.

RT: Azərbaycan ordusu – regionda ən zəngin ordudur – FOTO

Rusiyanın “Russia Today” telekanalı Azərbaycan ordusuna həsr edilən və “Azərbaycan ordusu: regionda ən zəngin ordudur” adlanan fotosessiyanı dərc edib.

METBUAT.info xəbər verir ki, bu barədə telekanal yazır:

“Azərbaycan ordusu, Dağlıq Qarabağ ətrafında Ermənistan ilə həll edilməmiş münaqişəyə görə daim döyüşə hazır vəziyyətdədir. 2000-ci illərin əvvəllərində Azərbaycan hərbi büdcəsini 20 dəfə artırıb. Bakı Rusiya, İsrail və Türkiyə istehsalı olan silahlar alır”.

RT qeyd edir ki, “Global Firepower” hərbi qüvvə reytinqində Ermənistanı 34 pillə geridə qoyan Azərbaycan 60-cı yeri tutur.

“Ötən 15 il ərzində Azərbaycan ordusu çox irəliləyib. Ölkənin müdafiəyə çəkdiyi xərclər 2003-cü ildə 160 milyon dollar, 2013-cü ildə isə 3,7 milyard dollardan ibarət olub”, - “Russia Today” əlavə edib. (oxu.az)

Akif Çovdarov tanınmaz hala düşüb – FOTO

Hazırda məhkəməsi davam etdirilən ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarovun yeni görüntüsü yayılıb.

METBUAT.info-nun Report-a istinadən məlumatına görə, foto Sabunçu Rayon Məhkəməsinin inzibati binasında çəkilib.

17 aydır həbsdə olan A.Çovdarovun fotosunda onun xarici görünüşündə dəyişikliyin olması gözə çarpır.

Bu, A.Çovdarovun məhkəməsi başlayandan sonra çəkilmiş ilk fotosudur.

“Bozbash Pictures”in aktyorları yol hərəkəti qaydalarını pozdular – VİDEO

“Bozbash Pictures”in aktyorları teleaparıcı İlkin Həsəni üçün evlənmə haqqında videosüjet çəkərək ona mahnı hədiyyə ediblər.

METBUAT.info Avtosfer.az-a istinadla xəbər verir ki, onlar həmin videonu sosial şəbəkələrdə paylaşıblar. Video maraqla qarşılanıb. İnsanları güldürən gənc aktyorların bu hərəkətinə yenə də gülənlər olub. Amma məsələ burasındadır ki, onlar bu süjeti avtomobildə hərəkətdə olan zaman çəkiblər və qayda pozublar.

Göründüyü kimi, avtomobil hərəkətdə olduğuna baxmayaraq, sürücü qismində nə Nicat Rəhimov (Şirin), nə Elşən Orucov (Fəlakət), nə də İlkin Misgərli (Qılman) təhlükəsizlik kəmərindən istifadə etməyiblər. Bundan əlavə, onlar sürücünün fikrini nəqliyyat vasitəsini idarə etməkdən yayındırmasında iştirak ediblər. Həmçinin sürücü də nəqliyyat vasitəsini idarə etməkdən diqqəti yayındıra biləcək söhbətdə iştirak edib.

“Yol hərəkəti haqqında” qanunun və İnzibati Xətalar Məcəlləsinin tələblərinə görə, bütün bunların hamısı qayda pozuntusudur. Bu tələblər həm sürücüyə, həm də sərnişinlərə aiddir. Bu tələbin pozulmasına görə isə sürücüyə 40 manat, sərnişinlərə isə 30 manat cərimə düşür.

Ermənilər cəbhədə iriçaplı pulemyotlardan istifadə edib

Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan və 82 millimetrlik minaatanlardan (5 mərmi) da istifadə etməklə sutka ərzində atəşkəs rejimini 118 dəfə pozub.

Bu barədə METBUAT.info-ya Azərbaycan Müdafiə Nazirliyinin mətbuat xidmətindən məlumat verilib.

Ermənistan Respublikası Noyemberyan rayonunun Voskevan kəndində və adsız yüksəkliklərdə, İcevan rayonu ərazisindəki adsız yüksəkliklərdə yerləşən mövqelərdən Qazax rayonunun Quşçu Ayrım, Kəmərli, Qızılhacılı, Bala Cəfərli kəndlərində və adsız yüksəkliklərdə, Berd rayonunun Mosesqex, Çinari, Ayqepar kəndlərində yerləşən mövqelərdən Tovuz rayonunun Ağdam, Ağbulaq, Muncuqlu və Əlibəyli kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən Azərbaycan ordusunun mövqeləri atəşə tutulub.

Tərtər rayonunun işğal altında olan Çiləbürt, Ağdam rayonunun Qaraqaşlı, Mərzili, Şıxlar, Sarıcalı, Baş Qərvənd, Cəvahirli, Yusifcanlı, Xocavənd rayonunun Kuropatkino, Füzuli rayonunun Qorqan, Horadiz, Aşağı Seyidəhmədli, kəndləri yaxınlığında, həmçinin Goranboy, Tərtər, Ağdam, Xocavənd və Füzuli rayonları ərazisindəki adsız yüksəkliklərdə yerləşən mövqelərdən də Azərbaycan Silahlı Qüvvələrinin mövqeləri atəşə tutulub.

ABŞ və Rusiya Suriyada təhlükəsizliyə dair mexanizmi bərpa ediblər

ABŞ və Rusiya Suriyada hərbçilər arasında münaqişələrin qarşısının alınması mexanizmini bərpa ediblər.

METBUAT.info RİA Novosti-yə istinadən xəbər verir ki, bu barədə jurnalistlərə ABŞ Dövlət Departamentinin nümayəndəsi Mark Toner bildirib.

“Onun nə dərəcədə dəyişdiyini deyə bilmərəm, lakin mənim bildiyimə görə, o, qüvvədədir”, - Toner deyib.

Jurnalistlərdən biri Rusiyanın bir müddət əvvəl qeyd olunan mexanizmi dayandırdığını Mark Tonerə xatırladıb. “O artıq bərpa olunub”, - deyə Toner cavabında bildirib.

ABŞ-ın aprelin 7-də Suriya aviabazasına raket zərbəsi endirməsindən sonra Moskva Vaşinqtonla imzaladığı təhlükəsizlik memorandumunu dayandırmışdı.

Meksikada insanları təyyarədən atdılar – VİDEO

Meksikanın Sinaloa əyalətində dəhşətli hadisə baş verib.

METBUAT.info xezerxeber.az-a istinadən məlumat verir ki, havada olan təyyarədən yerə üç nəfər atılıb. Onlardan biri xəstəxananın damına düşüb.

Polisin məlumatına görə, insanların öldürüldükdən sonra və ya sağ atıldığı məlum deyil.

Ehtimal edilir ki, hadisəni hazırda həbsxanada olan məşhur narkobaron “El Çapo” ləqəbli Xoakin Quzmanın tərəfdarları törədib.

Nyu-Yorkda “Trump Tower”in binasında 25 etirazçı saxlanılıb

Nyu-York polisi “Trump Tower”in binası qarşısında ABŞ prezidenti Donald Trampın miqrasiya fərmanına etiraz edən 25 nümayişçini saxlayıb.

METBUAT.info xəbər verir ki, bu barədə “Reuters” agentliyi məlumat yayıb.

Məlumata görə, etirazçılar liftin qarşısındakı vestibüldə əyləşərək “Qadağaya yox, dövrələmələrə yox, divarlara yox” şüarlarını səsləndiriblər. Təhlükəsizlik xidməti binanın girişini bağlamaq məcburiyyətində qalıb.

Martın 6-da Tramp Şimali Afrikanın və Yaxın Şərqin əhalisi müsəlman olan 6 ölkəsindən ABŞ-a girişi müvəqqəti olaraq qadağan edib. Amerika rəhbərliyi hesab edir ki, bu ölkələr terrorçulara “kömək edir” və ya terrorçular həmin dövlətlərin ərazisində sığınacaq tapıblar.

Dollar və avro ucuzlaşdı

Azərbaycan Mərkəzi Bankı (AMB) manatın aprelin 14-ə olan məzənnəsini açıqlayıb.

AMB-dən METBUAT.info-ya verilən məlumata görə, bu gün ABŞ-ın milli valyutası olan dolların məzənnəsi aprelin 13-ü ilə müqayisədə 0,02% ucuzlaşaraq 1,7026 manat olub.

Avro isə manata nisbətən ucuzlaşıb. Avrozonanın vahid valyutası 1,8175 manatdan 1,8075 manatadək azalıb. Əsas ticarət tərəfdaşlarımızdan biri olan Rusiyanın milli valyutası rublun məzənnəsi 0,0301 manatdan 0,0303 manatadək artıb.

Türkiyə lirəsinin məzənnəsi 0,4668 manatdan 0,4645 manatadək azalıb. Rəsmi məzənnəyə əsasən, 1 ingilis funt sterlinqi 2,1394 manatdan 2,1300 manatadək ucuzlaşıb. Gürcüstan larisinin məzənnəsi isə 0,7119 manatdan 0,7118 manatadək azalıb.

Bakıda 54 yaşlı qadını aldadıb, adına kredit götürdülər – VİDEO

54 yaşlı Bakı sakini Zamirə Əliyevanın başına maraqlı hadisə gəlib. 

METBUAT.info Xəzər Xəbərə istinadən məlumat verir ki, qonşuda yaşayan kirayəçilər onu aldadaraq mağazaya aparıb və bir sıra sənədlərə imza atdırıblar. Sonradan məlum olub ki, imza atdığı sənədlər əslində bahalı telefonların kredit müqaviləsi imiş.

Zamirə Əliyevanın sözlərinə görə, daha sonra həmin şəxsləri nə qədər axtarsa da, axtarışı nəticə verməyib. İndi isə mağaza onu məhkəməyə verərək hər ay pensiyasının müəyyən məbləğini tutur.

Hüquqşünasların sözlərinə görə, qadın polisə müraciət edərək hüquqlarını bərpa edə bilər. Alınan telefonların IMEI kodu vasitəsilə həmin şəxslər təyin edilə və dəymiş maddi ziyan geri qaytarıla bilər.

Uruqvayda daşqınlarla əlaqədar 1,7 min insan evlərini tərk edib

Uruqvayda yağışların yağması və Kuareym çayının daşması ilə əlaqədar baş vermiş güclü daşqınlar səbəbindən 1,7 min insan evlərini tərk edib.

METBUAT.info Report-a istinadən xəbər verir ki, bu barədə Cənubi Amerika ölkəsinin Fövqəladə Vəziyyətlər üzrə Milli Sistemi məlumat yayıb.

Məlumatda bildirilir ki, 1000-dən çox insan özü təhlükəsiz yerə gedib. Digərlərini isə yerli orqanlar təxliyə edib.

Sakinlər 15 müvəqqəti sığınacağa yerləşdirilib. Onlar qida və zəruri əşyalarla təchiz olunublar.

İndi Kuareym çayının səviyyəsi 8,8 metr, yaxud çərşənbə günü ilə müqayisədə 3 metr aşağıdır. Hakimiyyət orqanları hesab edir ki, əgər daşqınlar yenidən başlamasa, sakinlər 2 gün ərzində evlərinə qayıda bilərlər.

Putin və Ərdoğan arasında telefon danışığı olub

Rusiya prezidenti Vladimir Putin və onun türkiyəli həmkarı Rəcəb Tayyib Ərdoğan arasında telefon danışığı olub.

METBUAT.info-nun APA-ya istinadən xəbərinə görə, bu barədə Kremlin məlumatında bildirilir.

Prezidentlər telefon danışığı zamanı Suriyadakı vəziyyəti müzakirə ediblər.

“Tərəflər atəşkəs rejiminin möhkəmləndirilməsi məqsədi ilə birgə işi, habelə, Astana və Cenevrə formatlarında keçirilən Suriyaya dair danışıqlar prosesinə dəstəyi davam etdirmək niyyətində olduqlarını bildiriblər”, - məlumatda deyilir.

Putin və Ərdoğan Suriyanın Xan Şeyxun şəhərində aprelin 4-də kimyəvi silahdan istifadə ilə bağlı insidentin tezliklə beynəlxalq səviyyədə obyektiv və hərtərəfli araşdırılmasının vacibliyini qeyd ediblər.

Azərbaycanda bəzi ərazilərdə dolu düşəcək

Bakı və Abşeron yarımadasında sabah havanın dəyişkən buludlu olacağı, arabir tutulacağı, gün ərzində, əsasən yağmursuz keçəcəyi gözlənilir. Arabir zəif duman, gecə və axşam isə yarımadanın bəzi yerlərində çiskinli olacağı ehtimalı var. Arabir güclənən cənub-qərb küləyi axşam şimal-qərb küləyi ilə əvəz olunacaq.

Ekologiya və Təbii Sərvətlər Nazirliyinin (ETSN) Milli Hidrometeorologiya Departamentindən METBUAT.info-ya verilən məlumata görə, havanın temperaturu gecə 7-10° isti, gündüz 14-19°, yarımadanın bəzi yerlərində 22-24° isti, Bakıda gecə 8-10° isti, gündüz 19-21° isti olacağı gözlənilir.

Atmosfer təzyiqi normadan aşağı 758 mm civə sütunundan 751 mm civə sütununa enəcək.

Nisbi rütubət gecə 75-85%, gündüz 45-55% təşkil edəcək.

Gecə və səhər, əsasən qərb rayonlarında, gündüz isə bəzi yerlərdə şimşək çaxacağı, arabir yağış yağacağı gözlənilir. Qərb küləyi ayrı-ayrı yerlərdə arabir güclənəcək.

Havanın temperaturunun gecə 3-8° isti, gündüz 18-23° isti, dağlarda gecə 0-5° isti, gündüz 10-15° isti olacağı gözlənilir.

Aprelin 14-dən 16-dək əsasən şimal və qərb rayonlarında arabir yağış yağacağı gözlənilir. Bəzi yerlərdə şimşək çaxacağı, dolu düşəcəyi, dağlıq ərazilərdə qar yağacağı ehtimalı var. Qərb küləyi ayrı-ayrı yerlərdə arabir güclənəcək.

Ermənistan silahlı qüvvələri Ağdamda hərbi təlim keçirir

Ermənistan silahlı qüvvələri işğal altında olan Azərbaycan torpaqlarında hərbi təlim keçirir.

METBUAT.info-nun APA-ya istinadən xəbərinə görə, ermənilər bu gün saat 11:00-dan etibarən Ağdamın Uzundərə adlanan ərazisində təlimlərə başlayıb.

Erməni hərbçilər irimiqyaslı hərbi təlimlərdə, əsasən, ağır artilleriya qurğularından istifadə edirlər. Ağır artilleriya və zirehli texnikalardan açılan atəş səsləri rayonun bütün yaşayış məntəqələrində eşidilir.

İslamiadanın su səyahətinin Sabirabad mərhələsi başlayıb

“Bakı-2017” IV İslam Həmrəyliyi Oyunlarının Xəzərdən başlayan su səyahətinin Sabirabad mərhələsi başlayıb.

METBUAT.info APA-ya istinadən xəbər verir ki, Sabirabadda səyahət Suqovuşan kəndindən - Kür və Araz çayılarının qovuşduğu yerdən start götürüb.

Sərbəst güləş üzrə Avropa çempionu Seyfulla Mehdiyev, MMA üzrə dünya çempionatının qızıl medal mükafatçısı Azad Əsgərov və 10 yaşlı Sabirabad məktəblisi, futbol və rəsm həvəskarı Tahir Quliyev Kür və Araz çayılarının qovuşduğu yerdən su götürüblər. Sonra səyahət iştirakçıları Sabirabad şəhərinə yola düşüblər. Mərasim bu gün saat 20:00-da Sabirabad şəhərindəki Heydər Əliyev meydanında su festivalı ilə davam edəcək.

Qeyd edək ki, Xəzərdən başlayan səyahət marşrutu Azərbaycanın 15 şəhər və rayonundan keçəcək və yürüş mayın 12-də Bakı Olimpiya Stadionunda başa çatacaq.

Nazirlik vergidən yayınmaya görə həbs edilənlərin sayını açıqladı

Bu ilin I rübündə Vergilər Nazirliyi yanında Vergi Cinayətlərinin İbtidai Araşdırılması Departamentində vergi ödəməkdən yayınma və qanunsuz sahibkarlıq fəaliyyəti ilə məşğul olma faktları üzrə başlanmış 33 cinayət işi üzrə aparılan araşdırmalar zamanı 906,3 min manat vəsaitin dövlət büdcəsinə ödənilməsi təmin edilib.

METBUAT.info-nun məlumatına görə, bu barədə “Report” nazirliyə istinadən xəbər verir.

Departamentin İstintaq idarəsində 141 cinayət işi üzrə ibtidai istintaq tamamlanıb, 4 nəfər təqsirləndirilən şəxs barəsində həbs qətimkan tədbiri seçilib.

İstintaqı tamamlanmış cinayət işlərindən 31 iş üzrə 33 nəfər şəxs barəsində materiallar ittiham aktı ilə aidiyyəti üzrə baxılması üçün məhkəmələrə göndərilib. 110 cinayət işi üzrə büdcədən yayındırılmış vergilər ibtidai istintaq zamanı tamamilə ödənildiyinə görə onların icraatına xitam verilib.

Cinayət işləri üzrə keçirilmiş istintaq-əməliyyat tədbirləri nəticəsində vergi cinayətləri törətdiklərinə görə barələrində axtarış elan olunmuş 6 nəfər şəxs tutularaq Departamentin İstintaq idarəsinə təhvil verilib, ibtidai istintaqdan yayınan 49 şəxsin məcburi qaydada gətirilməsi, 92 şəxsin tapılaraq istintaqa gəlmələri, 96 şəxsin yerinin müəyyən olunaraq istintaqa məlumat verilməsi təmin edilib.

Vergi orqanlarının üzərinə düşən vəzifələrin icrasına köməklik göstərilməsi ilə bağlı müraciətlərə baxılması nəticəsində vergi yoxlamalarından, əmlakının siyahıya alınmasından yayınan və fəaliyyəti barədə bəyannamə təqdim etməyən 35 nəfər vergi ödəyicisi tapılaraq onların müvafiq vergi orqanlarına gəlmələri təmin olunub.

Meyxanaçı Kərim xəstəxanadan evə buraxılıb

Meyxana ustası Ağakərim (Kərim) Novruzov Mərkəzi Klinik Xəstəxanadan evə buraxılıb.

METBUAT.info xəbər verir ki, bu barədə APA-ya meyxanaçının bacısı oğlu Rüstəm Cənnətov məlumat verib.

Onun sözlərinə görə, meyxanaçı müalicəsini ev şəraitində davam etdirəcək. R.Cənnətov əlavə edib ki, dayısı özünü gümrah hiss edir, vəziyyəti yaxşıdır.

Qeyd edək ki, bir neçə gün bundan öncə meyxanaçının beyninə qan sızıb.

Tramp: ABŞ-ın Rusiya ilə münasibətləri yaxşı deyil

Rusiya ilə münasibətlər “ən aşağı həddə” çatıb.

METBUAT.info RİA Novosti-yə istinadən xəbər verir ki, bu barədə ABŞ prezidenti Donald Tramp NATO-nun baş katibi Yens Stoltenberq ilə danışıqların nəticələrinə dair mətbuat konfransında bildirib.

“Biz Rusiya ilə yola getmirik”, - Birləşmiş Ştatların rəhbəri deyib. Bununla yanaşı, o vurğulayıb ki, Moskva ilə münasibətlərin normallaşdırılmasına çalışır.

“Çox yaxşı olardı ki, biz Putin, Rusiya ilə münasibətləri düzəldərdik... Mən hamı ilə yaxşı münasibətdə olmaq istərdim... Səlahiyyətlərim sona çatdıqda, dünyada vəziyyət daha yaxşı olacaq”, - Tramp bildirib.

Ekspert: Siqaret bütünlüklə qadağan olunmalıdır

Azərbaycanda siqaret və digər tütün məmulatlarından istifadənin qadağan olunacağı yerlərin siyahısı açıqlanıb.

METBUAT.info Sputnik Azərbaycan-a istinadən xəbər verir ki, bu, yeni hazırlanmış “Tütün məmulatlarının istifadəsinin məhdudlaşdırılması haqqında” qanun layihəsinin son variantında əksini tapıb.

İqtisadçı ekspert Zahid Məmmədov deyir ki, iqtisadi cəhətdən inkişaf etmiş ölkələrdə qapalı məkanlarda siqaretin çəkilməsi bir qayda olaraq qadağandır:

“Bu, müzakirə mövzusu deyil. Dünyanın heç bir ölkəsində qapalı yerlərdə siqaretin çəkilməsinə icazə verilmir. Bu, uşaqların tərbiyəsi, ailənin qorunması üçün vacibdir”.

“Bir iaşə obyekti bundan ziyan çəkəcək deyə, milyonlarla insanın həyatını təhlükəyə atmaq olmaz. Bu qanun təcili olaraq qəbul olunmalıdır. Ümumiyyətlə, siqaret bütünlüklə qadağan olunmalıdır”, - deyə o bildirib.

Ölkədə kim nə qədər qazanır? – CƏDVƏL

Gələcək peşəni seçərkən qazanc amili də mühüm rol oynayır.

METBUAT.info “Sputnik Azərbaycan”a istinadən xəbər verir ki, qazanc dedikdə, ilk növbədə, aylıq gəlir nəzərdə tutulur.

Azərbaycanda, eləcə də dünyada, son illər ərzində yaxşı gəlir gətirən peşələrdə müəyyən dəyişikliklər baş verib.

Məsələn, bir vaxtlar heç mövcud olmayan İT mütəxəssis hazırda yaxşı qazanc gətirən peşələrdən sayılır. Azərbaycanda hansı sənətin sahibləri və yaxud hansı işlə məşğul olanlar daha çox aylıq gəlirə sahib olurlar?

Beləliklə, aylıq maaşlar üzrə xüsusi cədvəl hazırlanıb.

Cədvəl hazırlanarkən Dövlət Statistika Komitəsinin məlumatlarından və aparılmış sorğunun nəticələrindən istifadə edilib.













U.A.

Azərbaycanın XİN rəhbəri Macarıstana səfər edəcək

Azərbaycanın xarici işlər naziri Elmar Məmmədyarov Vişeqrad qrupu və Şərq Tərəfdaşlığı ölkələrin xarici işlər nazirlərinin Varşava toplantısı çərçivəsində Macarıstanın xarici işlər və ticarət naziri Peter Siyarto ilə görüşüb.

Xarici İşlər Nazirliyinin mətbuat xidmətindən METBUAT.info-ya verilən məlumata görə, görüşdə ikitərəfli münasibətlərin gələcək inkişaf perspektivləri və mümkün əməkdaşlıq sahələri barəsində fikir mübadiləsi aparılıb.

Həmçinin, çoxtərəfli formatda, beynəlxalq təşkilatlar çərçivəsində qarşılıqlı dəstəyin davam etdirilməsinin vacibliyi qeyd edilib. Tərəflər ikitərəfli müqavilə-hüquq bazasının genişləndirilməsinə dair fikir mübadiləsi aparıblar.

E.Məmmədyarov həmkarının Macarıstana səfər dəvətini məmnuniyyətlə qəbul etdiyini vurğulayıb.

O, tərəf müqabilinə Ermənistan-Azərbaycan, Dağlıq Qarabağ münaqişəsi üzrə danışıqlar prosesinin son durumu barədə məlumat verib, BMT Təhlükəsizlik Şurasının qətnamələrinə uyğun olaraq Ermənistan qoşunlarının bütün işğal olunmuş Azərbaycan ərazilərindən çıxarılmalı olduğunu və münaqişənin Azərbaycanın beynəlxalq səviyyədə tanınmış ərazi bütövlüyü və suverenliyi çərçivəsində nizamlanmalı olduğunu diqqətə çatdırıb.

P.Siyarto Azərbaycanın Avropa İttifaqı ilə tərəfdaşlıq sazişi üzrə danışıqlıqların başlanması prosesinə Macarıstanın tam dəstək verdiyini bildirib. Görüşdə nazirlər həmçinin gündəlikdə olan layihələr, xüsusilə də Şimal-Cənub nəqliyyat dəhlizi barəsində geniş fikir mübadiləsi aparıblar.

İlham Əliyev Vitali Kliçkonu qəbul edib

Bu gün Azərbaycan Prezidenti İlham Əliyev Kiyev Şəhər Dövlət Administrasiyasının başçısı Vitali Kliçkonu qəbul edib.

METBUAT.info-nun xəbərinə görə, bu barədə Azərbaycan Respublikası Prezidentinin mətbuat xidməti məlumat yayıb.